🙏🙏🙏🙏🙏🙏🙏🙏
Aye Rabb-e-jahaa'n !! Panjetan-e-paak ke khaliq
Is qaum ka daaman Gham-e-Shabbir se Bhar de.
🙏🙏🙏🙏🙏🙏🙏🙏
Baccho ko ataa kar Ali Asgar ka tabassum
Budho ko Habeeb Ibne Mazahir ki nazar de.
🙏🙏🙏🙏🙏🙏🙏🙏
Kamsin ko mile walwal-e-Aoun-o-Mohammed
Har ek jawaa'n ko Ali Akbar ka jigar de.
🙏🙏🙏🙏🙏🙏🙏🙏
Maao ko sikha Sani-e-Zehra ka saleeqa
Behno ko Sakina ki duaon ka asar de.
🙏🙏🙏🙏🙏🙏🙏🙏
Ya Rabb !! Tujhe beemari-e-Abid ki qasam hai.
Beemar ki raaton ko shifa-yaab seher de.
🙏🙏🙏🙏🙏🙏🙏🙏
Muflis pe zar-o-laal-o-jawaahir ki ho barish
Maqrooz ka har qarz adaa ghaib se kar de.
🙏🙏🙏🙏🙏🙏🙏🙏
Paband-e-rasan Zainab-o-Kulsoom ka sadqa
Be-jurm aseero ko rihaayi ki khabar de.
🙏🙏🙏🙏🙏🙏🙏🙏
Jo Maayein bhi roti hai ba-yaad-e-Ali Asgar
Un Maaon ki aagosh ko aulaad se bhar de.
🙏🙏🙏🙏🙏🙏🙏🙏
Jo Haq ke tarafdaar ho woh hath ataa kar
Jo Majlis-e-Shabbir ki khaatir ho woh ghar de.
🙏🙏🙏🙏🙏🙏🙏🙏
Qismat ko fakat khaak-e-shifa baksh de Maula
Main ye nahi kehti ke Mujhe laal-o-gohar de.
🙏🙏🙏🙏🙏🙏🙏🙏
Aankho ko dikha Rauza-e-Mazloom ka manzar
Qadmo ko Najaf tak bhi kabhi Izn-e-Safar de.
🙏🙏🙏🙏🙏🙏🙏🙏
Jo chadar-e-Zainab ki azadar hai Maula
Mehfooz rahe aisi khawateen ke parde.
🙏🙏🙏🙏🙏🙏🙏🙏
Gham koi na de humko siwa-e-gham-e-Shabbir
Shabbir ka gham baant raha hai to idhar de.
🙏🙏🙏🙏🙏🙏🙏🙏
Kab tak rahoon dunya me yateemo ki tarah Main
Waaris mera pardey me hai, zaahir usey kar de.
🙏🙏🙏🙏🙏🙏🙏🙏
Manzoor hai khwaabo me hi Aaqa ki ziyarat
Parwaaz ki khwahish hai na Jibreel ke par de.
🙏🙏🙏🙏🙏🙏🙏🙏
Jis dark e sawaali hai farishtey bhi, bashar bhi
Aawara-e-manzil hoon, mujhe bhi wohi dar de.
🙏🙏🙏🙏🙏🙏🙏🙏
Jo deen ke kaam aaye woh aulaad ataa kar.
Jo katt ke bhi ooncha hi nazar aaye wo sar de.
🙏🙏🙏🙏🙏🙏🙏🙏
Khairaat-e-dar-e-shaah-e-Najaf chahiye mujhko
Salman-o-Abuzar ki tarah koi hunar de.
🙏🙏🙏🙏🙏🙏🙏🙏
Sehraaon me Abid ki musaafat ke siley me
Bhattke huwe rehro ko samardaar shajar de.
🙏🙏🙏🙏🙏🙏🙏🙏
Sar par ho sada parcham-e-Abbas ka saaya
'Mohsin' ki dua khatm hai, ab isko asar de.
🙏🙏🙏🙏🙏🙏🙏🙏
ELAHI AAMEEN